البوكمال - مدينة فوق اروع حضارة

صفحات من تراث وتاريخ وقصص
 
الرئيسيةس .و .جبحـثالأعضاءالمجموعاتالتسجيلدخول


شاطر | 
 

 قصائد بالقهوة العربية

اذهب الى الأسفل 
كاتب الموضوعرسالة
????
زائر



مُساهمةموضوع: قصائد بالقهوة العربية   الأحد نوفمبر 29 2009, 14:59

قصائد القهوة

بما أن القهوة رمز الكرم عند العرب فان الشيخ سعد بن قطنان السبيعي يعتبر من رموز الكرم والسخاء في قبيلة سبيع وأحد مشاهير كرماء العرب وهو القائل في القهوة
جر الفراش لنا وهات الدلالي @@@ أربع مغاتير على النار تدنا
ترى حلاة النار دوم إشتعالي @@@ وسوقة فناجيل عليهم من أدنا
فنجال أشقر مثل دم الغزالي @@@ ليا نقص شيء من الكيف زدنا
أتعب لها بالسوم لو كان غالي @@@ لو كان زود بالثمن ما نشدنا
نشري لها المثلوث هو شف بالي @@@ لو كان سوقه نازح عن بلدنا
ياما دفعنا بالثمن من ريالي @@@ غير القرا نسهر لهم ما رقدنا

وله أيضا في القهوة
قم يا رويشد شب ضو المناره @@@ ثم هات من صوته يقود المسايير
نجرٍ ليا حرك تزايد عباره @@@ يا زين صوته بين عوج الدواوير
يا مسوي الفنجال كثر بهاره @@@ جلفٍ ويتلنه ثمانٍ مغاتير
حاذور يالصباب تثني مداره @@@ ألا على اللي ينطحون المخاسير
أحد ليا سيّر عرفنا وقاره @@@ وأحد ليا سيّر يدور التفاكير
كم واحدٍ ناشي بليا خساره @@@ مصبرٍ نفسه على البخل تصبير
هو يحسب إنّا ما نعرف الصقاره @@@ يعد عمره من حساب المناعير
يا حبنا والله لجمع التجاره @@@ لولا الحياء حنا نعرف المعاذير

ومن قصائد القهوة نختار لكم هذه الأبيات من ضمن قصيدة طويلة للشاعر المعروف محمد العبدالله القاضي وهي في وصف القهوة وطريقة اعدادها
دنيت لي مـن غالي البن ما لاق @@@ بالكف ناقيها عن العذف منسوق
إحمس ثلاث ٍ يا نديمي على ساق @@@ ريحه على جمر الغضى يفضح السوق
واياك والنية وبـالك والاحـراق @@@ واصحا تصير بحمسة البن مطفوق
ليا اصفرّ لونه ثم بشت بالاعراق @@@ صفرا كما الياقوت يطرب لها الموق
وعطّت بريح ٍ فاخر ٍ فاضح ٍ فاق @@@ ريـحه كما العنبر بالانفاس منشوق
دقه بنجر ٍ يسمعه كـل مشتـاق @@@ راعي الهوى يطرب الى دق بخفوق
لقّـم بدلّـة مولـع ٍ كنها ساق @@@ منصوبـة ٍ مربوبـة ٍ تقل غرنوق
خله يفوح وراعي الكيف يشتاق @@@ ليا طفح له جوهر ٍ صح له ذوق
أصفر قموره كالزمـرد بالاشعاق @@@ وكبارها الطافح مـا صافي الموق
زلّه على وضحا بـها خمسة رناق @@@ هيل ٍ ومسمار ٍ بالاسباب مسحوق
مع زعفران ٍ والشمطري ليا انساق @@@ والعنبر الغالي على الطاق مطبوق
فيلا اجتمع هـذا وهـذا بتيفاق @@@ صبّه كفيت العوق عن كل مخلوق
بفنجال صين ٍ زاهي ٍ عند الارماق @@@ يغضي بكرسيّه كما اغضاي غرنوق
إليا انطلق من ثعبته تـقل شبـراق @@@ رنـق ٍ تصوّر للحمامة على الطوق
شكّل على الفنجـال لونه إلى راق @@@ دم الغـزال ليا انمزع منه معلوق
خمـر ٍ إلى منه تسلسل بالاريـاق @@@ وعليه من ما صافـي الورد مذلوق
راعيه كنه شارب ٍ ريـق تريـاق @@@ كاس الطرب وسرور من ذاق له ذوق


يا كليب شب النار
ومن أشهر ما قيل في القهوة هذه الأبيات وخصوصا البيت الأول للشاعر دغيم الظلماوي حيث قال
يا كليب شب النار يا كليب شبـه === عليك شبه والحطب لـك يجابـي
حنا علينا جيب ماها وحبـه === وعليـك تقليـط الـدلال العذابـي
ادغث لها يا كليب من سمر جبـه === وشبه ليامنه غفـى كـل هابـي
واحرص على جمره احراق حبـه === ياما العرق تشوف على الحب ذابي
ودق البهـار وبهـره ثـم صبـه === تصبغ على الفنجال مثل الخضابي
ونجـره توال الليـل يدعيك نـبـه === لا عوى يشدي حس ذيبٍ بنابـي
الوالمه يا كليـب عجّـل بصبـه === والرزق عند اللي يجيب السحابي
ومن يوجعه رأسه ترى الهيل طبه === وليا تقهوا كيفة الرأس طابي
بـاغ ليـا شبيتهـا بالمشـبـه === تجذب لنـا ربـع سـراة غيابـي
سـراة ليـل وناطحيـن مهـبـه === لا نسنست يا كن به سـم دابـي
مع كبش مصلاح لـك الله نجبـه === لا دبـر الهيـن متيـن العلابـي
إن شابط المنزوع خطـو الجلبـه === ياما حلا يا كليب خبط الركابـي
آقف لهم وأبدي سـلام المحبـه === لا جنّب الهيّن عريض العلابي
بكلامٍ أحلى من شخاليل جبه === وأحلى من السمن الجديد العرابي
خطو الولد فوقه زبـونٍ وجبـه === ويجي عليهم من حساب الزهابـي
بنسريةٍ يا كليـب صلـفٍ مهبـه=== متلطميـن وسوقهـم بالعقـابـي
وأصبر وإن الصبر يا زين غبه === يرقيك روس مشمرخات الهضابي
ومن لا صبر يا كليب في حكم ربه === هذاك يوم الحشر ماله ثوابي
وهذه قصيدة للشيخ تركي بن حميد العتيبي في وصف القهوة
يا ما حلا يا عبيد في وقت الاسفار @@@ جذب الفراش وشب ضو المناره
مع دلة تجذا على واهج النار @@@ ونجر اليا حرك تزايد عباره
النجر دق وجاوبه كل مرار @@@ ما لفه الملفوف من دون جاره
في ربعة ماهيب تحجب عن الجار @@@ لامن ولد اللاش ما شب ناره
وأخير منها رقعتين بالأسحار @@@ لا طاب نوم اللي حياته خساره
تلقاه في يومٍ يضيعن الأفكار @@@ يومٍ على المخلوق ما أطول نهاره
وقم في قصير البيت حشمة ومقدار @@@ لو جار فإدمح له ولو به خساره
ترى النبي وصى على الجار لو جار @@@ خذ الحذر يا عبيد عقب النذاره
رافق قوي الدين حفّاظ الأسرار @@@ ينفعك في يومٍ يجي به كراره
ترى الهوى والغي هن شر الأشرار @@@ ومن داس عار الناس داسوا لعاره
جنب ردي الكار ما فيه تعبار @@@ ما فيه من فعل المناعير شاره
واسلم ودم بالخير يا طير غيمار @@@ وصلوا على المختار ما غار غاره
وهذه قصيدة للشيخ عجران بن شرفي السبيعي الذي اشتهر بأنه لا يثني الدلة ولا يذبح الماعز لضيوفه حيث يقول في القهوة ولمن يجب تقديمها ويستحق تناولها
يا فهيد صك النجر يوحيك بتال @@@ صكه كفاك الله جميع الأذايا
استدن نجر في الدهر يعول اعوال @@@ اعوال سبع حاديته الضرايا
وعليه كيف لي من البن فنجال @@@ جعل الرخوم ونسلها لك فدايا
وعده لحماي النوايب والأثقال @@@ في الضيق لامن إلتقن المنايا
واللي يحزب زاد بيته ليا اكتال @@@ وحط المعاني الطيبة له شرايا
واللي ليا رد البرا بين الأعمال @@@ لا رفعوا لقطيهن بالهوايا
واللي يروي حربته بالتجيوال @@@ له عادةٍ يرخص سمان العطايا
وباقي العرب خله ولو كان زعال @@@ هذا وبالمجلس كثير الحكايا

والشيخ مشعان بن هذال قال في القهوة
قم سو فنجال ٍ ترى البال منداش @@@ لعيـون من قرنه على المتن مرجود
فـي دلـة ٍ مربوبـة ٍ كنها شاش @@@ وبـهارها مقدار خمسة عشر عود
والهيل حطه لا تداني ولو جـاش @@@ ومـن الزباد اقنع على شذرة العود
أبـيه رسـم ٍ للنشاما عن اللاش @@@ فاللاش لا فاقـد ولا هـو بمفقود
تـر لـذة الدنـيا معاميل وفراش @@@ وصينية ٍ يركض بـها العبد مسعود
والطيب سنة والردى كنـه الطاش @@@ واللي يريـد الجود ما هوب مردود
فـي ربعـة ٍ يقعد بـها كل هتاش @@@ يفـرح بـها اللي من دناياه مضهود
وصفرا تلوح بالضحى كـل مهبـاش @@@ يصطي علـى قلـب المناعير بالعود
يالله طلبتك عنـد قودات الادبـاش @@@ ابـل ٍ مغاتيـر ٍ ويبـرالهن سـود
مربـاعها الصمان تبعـد عن الطاش @@@ ومقيضهـا دخنـة ليـا صرّم العود
أبـي ليـا جانـا من المال شوبـاش @@@ وتطاوحت من بين الاسلاف جلحود
مـن لا يروي شذرة السيف لا عاش @@@ عـسى عليه مـورّد الجيب مقدود

والشيخ هايس بن مجلاد يقول أيضا
قم سو ما يصبغ على الصين يا ذياب @@@ بدلال يشدن البطاط المحاديب
احمس ليمن العرق فوقها ذاب @@@ واستدن ما يجذب عليك الشراريب
نجر يصيح من الطرب تقل بحجاب @@@ يصبر على طول الدهر للمواجيب
وليا انطلق من مزلقه كنه خضاب @@@ ورس صبغ بكفوف بيض الرعابيب
صبه لمن قاد السرايا للأجناب @@@ في مفرسه يشبع النسر والذيب
والثاني اللي وان لفوله على ركاب @@@ قدام بيته تقل مجزر قصاصيب
والثالث اللي وان غشى الزمل ضبضاب @@@ يرخص بعمره دون زمل الرعابيب
وباقي الملأ يكفيهم التول لو شاب @@@ رصاصة المجلس حمير المشاعيب
اللي نهار الكون يفزع بمصلاب @@@ كبار الأنفس ساهجين المواجيب

والشاعر محسن بن علي بن جغيثم السبيعي قال أيضاً في القهوة
يا عيد شب النار قم سو قم سو @@@ وسو فنجالٍ وزين قناده
هات الدلال ووسع حفرة الضو @@@ شب بحطب سمرٍ ولوعٍ عراده
خل النشاما لا تلافولك وجو @@@ يلقون من جدك مراسيم عاده
إحمس من البن الخضر لاتلافوا @@@ وللعود حط شداد وألا وساده
وبهارها هيلٍ من الباخرة تو @@@ توه منزّل من سنابيك ساده
مع البحر ملفاه وألا مع الجو @@@ مع زعفرانه كبر رجل الجراده
حتى يجي فنجالها لاتقهووا @@@ مثل صفار البيض في كأس ساده
فإن كان هم عجلين قل تغدوا @@@ وألا العشاء مضمون مثل العباده
حتى لا راحوا لأهلهم وقفوا @@@ كلٍ يعد الطيب على إنفراده

وأيضاً الشاعر عبدالهادي بن راجس السبيعي قال في القهوة
أوي فنجال يصبه مسويه @@@ وحنا سوالفنا على جال ضوه
في ربعة والبيت يرفع بقاريه @@@ بيت على ماقيل يرفع بقوه
تالي نهاره وأوله دايج فيه @@@ قم سو فنجال المطاليق سوه
احذف لها رمث كبار مثانيه @@@ تو الجماعة نازلين بجوه
والماء تخيّر من زلاله وصافيه @@@ من مزنة ماخاشر العج جوه
واحمس ولاتحرق وحاذر تنييه @@@ ما بين فرغها ومابين توه
وإجغف لها من طيب الهيل غاليه @@@ والزعفران بكثرة الهيل شوه
صبه على اللي طيبات معانيه @@@ واختص من هو بالمراجل تفوه
اللي يعّنز لك ليا رحت ناصيه @@@ يسلم ولا يسلم ردي المروه

والشاعر سلطان بن مبارك الأدغم السبيعي يقول أيضاً في القهوة
يا سليم شب الضو مالك مهانه @@@ يجي لها ضوحٍ يقود السراتي
وأشغل بفنجال وزيّن زيانه @@@ وإحذر من الإحراق وألا النياتي
ريح وطعم راعيه ينشع لسانه @@@ أطرف حمر لونه كما دم شاتي
عده على اللي لا هرج لك تكانه @@@ قليل هرج وبالملاقا زناتي
يفداك من هو عايش بالذهانه @@@ وإيديه لحبال الردى قاضباتي
طاريٍ عليه الجود تالي زمانه @@@ زل الشباب وهو على ذالسواتي
عند الجماعة مهلقٍ في لسانه @@@ وهو لا يحذف ولا يجيب الحصاتي

----------

حياكم الله
الرجوع الى أعلى الصفحة اذهب الى الأسفل
 
قصائد بالقهوة العربية
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
البوكمال - مدينة فوق اروع حضارة :: الفئة الأولى :: منوعات المنتدى-
انتقل الى: